“رصي راسك” بالدارجة: كلام رباعي..فرحان وكاعي

أحمد الجَـــلالي

 حين يصل نقاش الثقافة والهوية إلى لغة المحكي اليومي “الدارجة” كتخلط لعرارم، ليس في المغرب فقط بل في جميع الثقافات حيث يتشكل الوجدان المجتمعي من موزاييك يستقر في النهاية على هيأة دارجة وطنية ومحلية متوارثة.
من عجائب علاقتنا وعلاقة الجميع مع دارجاتهم هو الصعوبة التي يجدونها في الإبداع بها رغم أنهم رضعوها مع حليب الأمهات. مفارقة تتطلب التوقف والبحث بلا شك.
في مصر مثلا، غزت أم الدنيا بيوت مئات ملايين العرب عبر لغتها الدارجة أو العامية، من خلال السينما والأغاني تحديدا، ولو قررت مصر عبد الناصر والسادات استخدام الفصحى في منتوجها الفني لكان معظمنا اليوم يتحدث الفصحى بطلاقة.
ودخلت العامية المصرية الوجدان المحلي والقومي من أوسع الأبواب: فهي لغة التواصل اليومي وبها كان ومازال الإبداع الفني أفلاما وأغاني. ولا يخفي المصريون اعتزازهم بها ورفعه لها إلى مرتبة اللغة وليس اللهجة.
في المغرب لنا كباقي شعوب العالم دارجتنا غير أن علاقتنا بها في مجال الكتابة مازالت متوترة: شعراؤنا بالفصحى وحتى الفرنسية أكبر نفيرا من الزجالين. من أبدعوا من ملحنينا في تطويع النصوص الزجلية إلى أغان قلة، مقارنة مع من سلك طرقا أخرى في التعبير الفني.
صدمتنا قبل نصف قرن تقريبا تجربة المجموعات صدمة استشفائية حين صالحتنا مع لغتنا الدارجة السمحة في الفترة الذهبية لناس الغيوان وجيل جيلالة ولمشاهب وإزنزارن.
وفي مجال الإعلام حاول البعض استخدام الدارجة في الصحافة المكتوبة لكن السقف توقف عند حدود دارجة بلا دسم تمتح من الشارع ولا تنهل من نبضه. أما من أرادوا القضاء نهائيا على الفصحى بذريعة قرب اللسان الدارج منا مقارنة مع “لسان قريش” فلم يفعلوا ذلك لوجه الله بل لأجندات مفضوحة. الدارجة ليست عدوة للفصحى بل رافد من روافدها الغنية: هذه لا ينبغي أن تلغي تلك.
“رصي راسك” وانسجاما مع هذه القناعات جرب قبل فترة ألا يحرم نفسه من هذه الإمكانية في التعبير الشعبي المباشر عما يشغله ويشغل أبناء وبنات شعبه، فكانت هذه النصوص الزجلية. أتقاسمها معكم آملا إمتاعكم قليلا وقياس درجة وصول الرسالة من عدمه.

دين الكلب:
ملي كانوا البقرات سمان والعروض عروض
حرمتوهم على النصارى والمسلمين وليهود
ومن بعد ملي بقا في بباهم غير لعظم وجلود
عاد تفكرتوا التامي و عبقادر واحمد وميلود؟
تبا لكل غشاش وهباش ونباش وازبيلة نمرود

*** *** ***
آش من شجاعة؟

بغيت نقول شي كلام أخويا
ولكن خفت تخلا دار بويا
نعم أنا مثقف ولاكمني خواف
عندي منقول وخاصني كتاف
حيت يلا مشي فيمن دابا
غيقولو عليا: الما والشطابا
زاد فيه مالو على حالتو؟
واش لبلاد مو ولا خالتو؟
شلا شمايت غيضحكوا
نولي علك فيه يمضغوا
شحال دويت قالوا بغا يكون بطل
وقال حمان: تسناو غادي يحصل
شحال غامرت لقيت راسي وحدي
شحال كابرت وضحيت بلي عندي
والو مكين غير راسي يا راسي
فعلا مالي على حالتي؟
علا شانا معنديش راسي؟
يعني: لهلا يقلب ويشقلب
منبقاش وحدي مزير معذب
الله على راحة
تبكي على أمها وتنوح
تعيش مشردة فسطوح
ادفع الكروصة وسط اشعيبة
دير ليك بحالهم تانتا شي لعيبة
يجي الفرج ولا تجي مصيبة
راسك بين الريوص أبوراس
أنا وانت وهو ومريم وعباس
سولني: ودبا راك شوية؟
قلت: مريضي ما عندو باس
*** *** ***
  دير غـــــربال:

ما تقولي هداك حرامي
ولا تقول: عواجت يامي
ميز بين الدلاح والبطيخ
شد لرض خمم دير زيخ
بالمفيد: دير غربال
الصافي يبقى
الراشي يطيح
إيه دير غربال
متعاود سؤال
بلاما تزيد ما فيا
وتخليني بلا نعاس
عاشرتهم من كل قنت
من الصحرا حتى لفاس
وبيناتهم ألف غرباوي
وكيقول أصلو سلاوي
تسلط عليا بحال دبابة
فضايحو ميسترها سلهام
وريحتو ما تغطيها جلابة
كياكل السوطة وعينو فلاص
ديما داوي خاوي بلا قياس
سمح فدراسة ضيع الأساس
بقا مجلوق خاطي ضراية
حوزت ليا جبتو حـــــــــدايا
بصراحة بقا فيا
دازت سنين وهو يتلحمس
علا والو يتقلق و يتحسس
ونا صابر على ما فيا
فأول فرصة كلالي رزقي
دبانتو طاحت فلكاس
طار بزربة غبرة
كلب خطف هبرة
قلت لراسي: بني كلبووون
نضت درت معاه القانووون
كلشي عندي مقيد مزمم
خوكم ناضي فتوثيق معلم
تعلمت منو ومن غيرو كثــار
كيف نزطم على رماد فوق نار
غناها عمربالشلحة: هاننا وناااان
زدت فيها: زمر كلو غيضوضان
صبر أبويا صبر مزيان
ولي محسوس لابد يبان
وملي يكون عقلي مزيان
نعاود ليكم قصة طكعان

 

*** *** ***

سي القاري:

شوف فيا مزيان
اسي القارئ
اراس لبريق
لا تقول انا فنان
وحافظ سواري
وضغيا كنعيق
شحال من فخ
منصوب ليك وليا
فكل طريق كية
شحال من حفرة
فوقها جخ
وتحتها الف جمرة
شحال من بيضة
مخبية فلون سمرة
شحال من فلك
تظنو فنهارك كمرة
تواضع وتواطا
براكا ما تعاطا
دنيا حلوة ولا مرة
وشحال من هضرة
مولاك وحدو
لي عارف سر الصرة
من ديك المرة
وحتا لهاد المرة
عقلك لنفسك ضرة
روحك عبدة وحرة
وتما وحلات الجرة
*** *** ***

فين عودي؟

اولاد حدو
كلها وعودو
وفين عودي انا؟
احيانا عليكم
احي انا
في بني حسن
لا حد فيا حن
في سوس
كلامي مسوس
وحتى ريافة
نساوني فضيافة
وشراردة لاموني
فاتوا ما سمعوني
ودكالة طعامهم
ما شفتو بعيوني
وشياظمة دفعوني
لهيه وتركوني
العار عليك الشاوية
فينكم اولاد حريز
ماشفت ذهب ولا لويز
ولا حيث انا فيلالي
من توالي مرزوكة؟
العار على مولاي علي
جدي بصح وبو اهلي
ميعادنا الربيع
وشي مدفونة
زينة مدهونة
بالقاعدة مدكوكة
*** *** ***

السلاح المنوي:

شي دراري صحابي
عايشين في روسيا
كنعتبرهم أحبابي
اعطاوني خبار قاسية
بين الحين والحين
هوما مع بوتين
عايشين وخدامين
قالوا ليا فتلفون
الرجل مشي مجنون
ولكن هاد ليام تبدل
نعاسو تغير وتحول
لتحت الارض نزل:
فرش حدا النووي
قرب عندو شي بوطونات
زرقات خضرات وحمرات
وسد عليه!
بعد سوقين خرج ونادى
جاو الشباب هازين فرادا:
امر نعاماس!
قاليهم غير بالحس:
شكون ولد منصور
ساكن شرق او لور؟
حيث سبق لي كتبت
ونشرت لو رسالة
ماهي معقول
ماهي بسالة
طلبت منو يفني
العالم الظالم
بالعرض والطول
ترجمها وقراها
فهمها وتسلغاها
اليوم جات خباري
تاصلوا بيا دراري:
قاليك صاحبك
غير تهنا ابن منصور
تفرج وتسوخر اللور
تسوخرت نعاماس
تكمشت قطعت الحس
انت عندك النووي
نعم ياس وي
اش دخلني انا
من أمة المنوي؟
*** *** ***
بوحمار:

كان عندو غير حمار
بيه عاش وبنا الدار
ولاخر كان عندو منيار
عاش ومات شفار
مبقاتش فشحال عندك
بقات فشكون أنت
ميهمنيش ولدك ولا بنتك
تسعود ماشي بحال ستة
كيعجبك تحنقيز الصيف
والنشاط بزز ولهيلالا
شغلك هذاك ابويا
دبر راسك اخويا
أنا ربي خلقني لشتا
لي كتبع فصل الخريف
نسمع الغيوان وجيلالة
نراجع وراقي نعقل حماقي
الهم همك والغم غمك انتا
*** *** ***

السلحوف مول الديستور:

واحد السلحوف
كان ديما كيدور
مرة يخرج لي من شمال
مرة يطلع لي من اللور
عندو سيفة شاهد زور
ف 2011
كانت استفتاء
كبير على الدستور
بعض معايا فلقهوة
قالي: وافين؟
قلت لو غير هنا
وفي خاطري
لعنت لو لوالدين
سولني ديريكت:
كيجاك ديستور؟
قلت لو: زوين
جمع الوقفة ناض
من داك نهار
خوا لبلاد
*** *** ***

أنا و المجدوب:

المجدوب قال كلامو
ملي بنادم كان عندو
ودنين وقلب
بلغ حكمتو وسلامو
نيشان وبجنب
لكن ولد ماطيشة
فنان هاديك لقبيلة
ملي بارت الحيلة
قالها وكانت ثقيلة:
وانا لمن عاودتو؟
من ذاك الوقت
لمخير عندو ودنين حمار
وقلب كلب
مشا المجدوب وولد مطيشة
وحنا عايشين
ولا نهار سولنا:
واش هادي عيشة؟!
*** *** ***
اللسان فيه لعظم:

اللسان ما فيه عظم
ياك السي ابنادم؟
باغي تعيش بلا لجام
يولي لغراب كي لحمام
اللسان اكبر عظم
هو سباب الهم والغم
انت غير داوي
عقلك خاوي
باغي اطلقها تسرح
ترعى وفليل تولي
كي زربان كي لمتلي
وانت تعلي باش تخلي
ونا نحلي باش نولي
تسوخر لهيه
حرك كراعك
بعد مني
سد فومك
لجم لسانك
خدم دماغك
*** *** ***
شي دخل فشي:

كنوبس تخشا فـCnss
Drops dived
Into a wild sea
For social peace
Of a human race
كثر بزاف التوسويس
عيش لا تموت فلغيس
عيشي عيشي ولا تموتيشي
جمع وطوي تا لعند مول الشي
Come what may mate
Honey, water or sh…..t

*** *** ***
داوي على ميلود:

سميتو ميلود
وكنيتو فارس
صاحبي قديم
من طفولة لمدارس
زمان ما تشاوفنا
جمعنا عزو ولمضاهص
كلمني بالفصحى ودارجة
وشوية فرنصاوية
خلط شعبان مع مارس
سمى لعجول عتارس
مناقشة فوضوية
حس بيا ما فهمتش
قالي سمح لي مدة هدي
مابقيتش نمارس
معرفتش اش كان يمارس
ضحكنا شوية وقلت لو :
كبرنا يا ميلود
سنين كثيرة هادي دازت
قالي بارك ومسعود
سولتو علاياش؟
قالي: جات نوبتي فدارت
لكبر عود سو
لكبر أكبر عدو
حروف في ودنو
تبدلت وعواجت
الرا ولات زي
دازت ولات دارت
الله يدينا فضي
ميلود فلكورة لعب حارس
عقلت عليه مزياااان
وعندي صور زمان
لكن شنو مبقاش يمارس؟
ميلود كيسول فيا ديما
منساش الطفولة
الحق يتقال
صراحة قصرت فحقو
نخلص الحق بالدرهم
ونزيد المثقال
غادي نرد ليه البال
يلا حياني ربي
مكينش حتااال…
لعمر قصير
والقلب بصير
والوقت قتال
*** *** ***
ترامب بويا لحليب:

حلاب بويا لحليب
والعالم عليك داوية
دجوبز..دجوبز
والخزينة خاوية
هاهو تاني وتاني
يجمع حب وتبن
ويدكس فلواني
تكعد يا محمود
وقت لخلاص هو هذا
مامنو هروب
جبد الحايل
لي مخبي فلوسادة
هذا عام الشدادة
عاد عادة عادة
هذا عام الحلابة
لا لبن لا حليب
غيبقا فروابة

*** *** ***

ضيوفنا اللئام :

في 1982 بحال غير البارح
جابوا كاميوات وهزونا
داونا لواحد لخلا وحطونا
لا اكل لا ما لا ظل
لا حد علينا طل
لا مقدم لا شيخ لا سارح
قالوا لينا قولو:
مرحبان مرحبان بضيوفنا الكرام
قلنا مرحبان مرحبان بضيوفنا الكرام
كان العاميل جا يدشن شي حاجة
متعطلش ديمارا وخلا وراه عجاجة
فات العصر جا الفورد
هزنا بحال لغنم وزاد
فات القنطرة والواد
لاحنا وكمل طريقو
جاتنا السخفة وجوع
لاغد مقدرناش نفيقو
ضعاف صغار معندنا بو حيلة
تعطلنا ولمعليم عطانا تحميلة
من هذاك زمان عندي مشكيلة
فيما شفت بنادم مستف فطريق
كنحس في قلبي وراسي حريق
وكنتخيل دوك ولاد لحرام
لي هلكونا جوعونا وقهرونا
وبزز منا قلنا وعاود قلنا:
مرحبان مرحبان
بضيوفنا الكرام
*** *** ***
في خاطر المتعفنين!

بورجوازي صغيور
حاسب راسو فرخ
زعما اوليدة
يعني مطيور
محاملش بنادم
على والو نادم
كيكره الايديولوجيا
وكيكراه النقاش
90 فلمية من مخو
عامر باش ومناش؟
ما عندو صحاب ولا حباب
خايف من خيالو
يقزقز من نبيح لكلاب
صدفة قرا في فرنصا
بفلوس جدو الاقطاعي
تمنا يكون قايد او اذاعي
دا من دنيا قرصة
وترسم فضريبة
وفيها قنا على سناء
بنت واحد خانز فلوس
ماشي من كازا ومشي سوس
من بلاصة ديما كنساها
المهم تحد معرف واش محسن
بغا فلوس لمرا ولا بغاها
سربا ليها جوج ذكورا
وضربها بورثة تاركة فاعلة
سناء 20 عام معاه حاصلة
مرة مرة كيقرا شي كتوب
جابهم بكري من باريز
ساد عليهم ديما في فاليز
قرب للتقاعد ولكن ناوي يترشح
باش يولي برلماني ويتبجح
مرة قالت ليه المدام
نديرو عمرة
فلمقام تضوا علينا الكمرة
وندعيو مع لحباب
محسن توتر وجاه اكتءاب
سد عليه الشرجم والباب
وبعد يومين مات بالجلطة
كان كاتب كولشي لختو
لي كانت عليه جاية ماشية
سناء الزغبية مشات حاشية
*** *** ***
بو الركابي:

بروليتاري
دمار وحوفار
مسوقوش فلي جاري
يطلع لجبال
ينزل لحفاري
من صغرو يلبس لي كان
شهر شهرين بلا عومان
ياكل دواز يقضي بلي كان
كيعرف سياسة هي الانتخابات
ويقول عاش المخزن
وعاشت النقابات
المشروبات هي القهوة وتاي
والعيد هو الحولي وفاتح ماي
بروليتاري من قاع القاع
حراسة وهجوم ودفاع
من الجامع داز للسكويلة شي ايام
وخرج يدمر وعاش مع ولاد لحرام
علموه ان الدنيا مرا ولمرا كلبة
وعلموه ان الرجل لفحل غير كلب
فينما كان وكيف مكان يقضي
وعلموه الشراب لا حب لا قلب
بروليتاري مقلاع ومسماري
بروليتاري صكع سرساري
عايش بالكذوب
ومدمن على نهاري
تارك الصلا
ولكن حريص على صلاة العيد
ويزيدها يوصل للجامع القصاري
كيكمي ماركيز والكيف
وكيسني بالزاي والليف
فالخدمة ساكت زيزون
وفدرب فهايمي عريف
بروليتاري بروليتاري
فعرسو غنى لصحابو
بعدما تبسم لحبابو:
حاري باري
امي قالت لي
نضرب الدراري
ولاح قرعة على نسيبو
دماه وجاب خلاه
وتهدمات الحفلة
وما بقا زواج
تفرق الجمع
ناض لعجاج
من داك نهار دار لحية
وحلف لا عاود تزوج
وبعد كل مصيبة دار كعية
كلما داز الوقت كيتعوج
المعطي بروليتاري
مشي امي ومشي قارئ
علاش كيوقع ب “زا”؟
سر من سرارو
اش كيدير بوحدو فلغابة ؟
لاحد جاب خبارو
واحد نهار المعطي غاب
وتقطعات خبارو
دازت سنين ومنين
كبرت ختو وماتو الوالدين
وقفت حديدة فزنقة
نزل بنادم براني
معرفو حد
نزلت وراه درية
مستورة نص فخد
شاف رباعة كيكميو
قرب منهم
تنواو جمعو البلية:
معرفتونيش بلا تفلية؟
وادراري هاو اريو؟
أنا المعطي..سنيطيحة
فاك يو
خونا من سبانيا
مشا لماريكان
وتماك كان لي كان
*** *** ***
ملي فاق ولد اشعيبة:

مرة مرة كينسا التبوحيط

كيعزم ويركل التردد
كيظن شد راس الخيط
واحكم راس الحيه
بلغراز والثنية واللية
ويبدا يقلب علشريط
يطير من عينيه لجاج وتمن
ينفض لغبرة  والتبن
كيقول هذا نهاري
وينادي جارو وجاري
سمعوا يا الناس
امي وعالم وقاري
هادي قصتي واخباري:
كلشي سكت…كلشي صغا
كلشي تقنت..الصمت طغا
طال سكاتو…غاب غواتو
لكلام حجرة فلحلق وحل
المعنى وصل لسان وحصل
واش ضروري ملكلام؟
واش ضروري من سلام؟
ولسان الحال بيه اشنديرو؟
قالها لراسو في نفسو
لاخر مرة وتقطع حسو
لقاو فيدو وريقة
صغيرة ورقيقة
كاتب فيها: كلكم زيرو
*** *** ***

الطلاميس المقدس:

كيبان بحالي كلشي باين
ولكن ما باين والو
الدنيا كحلة زحلة
تخموم وفقايص ومحاين
سارو وعليك ما سالو
بقيتي فرادي فلوحلة
قالو: اش بغينا بصداعو
بعدما شراو وعاود باعو
كيبان كلشي واضح
هشيش ورطب وقاصح
كيبان بحال يلا كين المعقول
وكين شتا ولحرث والفول
لكن من فوق قال ربي ونبي
ومن تحتها السحاسح
كون كذاب او قاصح
كيف كيف يا بنعمي
غير دايز شفتك تكمي
تلهيت شوية بهمك
بيلاما طرطق همي
*** *** ***

خالوطة:

سمعت هاد ليام
نايضة سبان وشدان
شدو شي حد !
نسيت سميتو
مكتحفظليش كنيتو
المهم فلان بن فلان
مرة كيقرص بحال النحل
مرة كيزنزن بحال الذبان
عندو الزهر والضمان
بلاغ وتضامن وبيان
ديسير وشراب ورمان
دواو عليه من ساعتو
جات قبيلتو وجماعتو
كلهم قالوا رجل مزيان
سولت راسي على راسي
عنداك تكون بحالو وتشد
دخلت في راسي وبقششت
نغترت وعاودت زت فتشت
سمعت فيا شي تشاش
صراحة انا ما خاين ما غشاش
ولكن الوقت وزمان
الاحتياط مزيان
لابد نديكلاري براسي
تبان نقرتي من نحاسي
نعرف شكون انا بالذات
وا الرجال….وا لعيالات
متزهدوش تجار وفراشة
كبار وصغار ..وحاشى
الشك حرام..
المونافري مونافري
والباشا يبقى باشا
لي حس بزيكزاك فذاتوا
او غلباتو الضحكة والبشاشة
يعلم براسو ..يظهر باسو
يجمع صرتو…ويطلع لعكاشة
دق دق دق
شكون؟
بغيت الحراسة
لاش؟
شاك فراسي ممزيانش
عندي الشك ديرولي بلاصة
سمح لينا انت ممحكومش
سير بحالك
وخا هكاك منمشيش
دخلوني نتقاد عل وعسى
فقت خير وسلام
برققت..تلمست صدري
نبتت فيه البارح دوحاسة
*** *** ***

لعرارم:

حيث تخلطوا لعرارم
شديت راسي ولرض
مانوض بحال بنادم
حتى تبان السنة ولفرض
شفت لهيه..يعني بعيد
بان لي غاشي فسيفة قرد
قرب مني وقال:انا خليد
زها علي الحال ونسيت
ماقريت حتى عييت
قلت على كل حال
مرحبا بك يا وليد
سولني اش كنعمل ؟
قلت ما نجار ما بحار
ما حداد نطوع لحديد
أنا كاتب مكتوبي نار
عييت نطوع لكلام
حيث المعنى لذيذ
وحيث الفكرة تفيد
لكن لمن عاودتو ؟
زمان الكلمة فات
ولي يذوق المعاني مات
لحرام حلال والحلال حرام
عليها عمي الظاهر قال:
راسك حمار اخالي سلام
ايوا نوض راه فاتتني الدوخة
قبل ما تضحك المذبوحة علمسلوخة!!
*** *** ***
اش قال الشيباني؟

صحني احكيم شيباني
دا ف ليام وجاب
قالي زم فمك وحضي
لسانك من لكلاب
لكن عدياني هوما فمي ولساني
منقدرش نكون فبلادي زيزون وبراني
نصبح على مهمومة
ونمسي على مكواني
قل لي يا حكيم يا شيباني:
واش نعيش الف عام
يلا قضيت العمر كلو رعواني؟
سكت الشيباني وزاد فطريقو
راسي وقلبي زاد حريقو
كلها مهمومة مردومة
فام مفتوحة ولسون مزمومة
غنيوا مكواني مكواني
الكناوي قل للسنتير يزير
راها مزالة مهمومة
سدوا ودنيهم يا الشيباني
بوحدي ديت اللومة
انده انده لحمار عيا
العقبة صعيبة ملعونة
اللقمة مرمدة حارة وسخونة
رصي راسك يقلال باسك

***  ***  ***

سيدي بليوط:

كازا يا نوارة ..يا مجمـعة أوليا وسكـــــــــارى

فكـل حي وحـارة.. في الحضـرة البيــــــضاوية

سيـدي بليوط يا بابا… شايلاه يابو الـــــغلابـة

بغينا الإصلاح دااابا….الشعب كلاتو الميزيريا

كل مرة تجي عصابة…الوعود مشات ضبابا

يمين وشــــمال وبلا لون… ولحايا وخوانجية

اليوم قالك كولوا لحمام.. وشـــربوا الليبرالية

مضرا شخبار الصحيحة والمــندوبية يا نبيلة؟

قالو بكري نمل العتبة عنوان عسل المصرية

حالاتو على خالاتو..أرا أرا..دفع لحمار بيا

تعليق:

هادي أول رصي راسك بالدارجة…سيادنا آش بان ليكم نزيدو فيه ولا حدنا هنا…تبقى حلاوتها زبيبة كحلة حلوة بلا وحلة.

 

 

 

 

 

 

تعليقات الزوار
جاري تحميل التعاليق...

شاهد أيضا

يستخدم هذا الموقع ملفات تعريف الارتباط لتحسين تجربتك. سنفترض أنك موافق على هذا ، ولكن يمكنك إلغاء الاشتراك إذا كنت ترغب في ذلك. موافقالمزيد