توقيع: المجدوب الأصغر
آش من شيخ ولا بطيخ؟
وتا اش من شيخة ولا بطيخة؟
أسيدي هاك الشيخ وزيدك الشيخة
ولكن اعطيني حقي في البطيخة
وحيد من عقلي تشليلة الكليخة
أش من شيخ ولا شيخة؟
دوي لي على حقي
وخدمتي وقرايتي ودوايا
بلغة واضحة صريحة
دوي لي على لي ضربو الشوا
ومنعونا حتا نشموا الريحة
آش من شيخ ولا شيخة؟
قولي علاش الخبز مرار واحرار
وبقينا لا شريحة لا “برمة” اصحيحة؟
وتا أش من شيخة ولا شيخ؟
آش جاب كوعوا لبوعو
واش جاب الجاوي للزرنيخ؟
نوض أوا نوض
بصح نشبهو ليهم في اشكل
ولكن القرود غير قرود
نوض اوا نوض
أش من شيخ ولا سيدي زكري
أجي بعدا ساكن ولا كتقلب تكري؟
نوض أوا نوض
أش من شيخة ولا شخشيخة؟
أجي بعدا واش فايق ولا مغيب في تضويخة؟
تعكد شوف آش داير بيك
جمع الوقفة وتوكض
حالتك حالة وحزانك هطالة
يامك تالفة يومك موسخ
و الغد اكحل مرمد
نسا الشيخة..ديها فلي ضاراك
نسا الشيخ..ديها فلي خاصاك
سير حتى تكون انت هو انت
سيري حتى تكوني انت هي انت
وحتى يشبع البطن وتزيان الصحيحة
حتى تبدل التبن و وتقاد لك الريحة
حتى تتبدل الحالة
واجي نجدبوا مع حمادشة
ونتحيروا مع جيلالة
حالتك حالة
حالتك حالة
حالتك حالة
سير حتى متبقاش
غير نمرة شايطة
وعقل فراس مجنون
واجي نشوفوا تاريخ العيطة
ونفاكدوا فلملحون
اشعيبة آآآشعيبة
فوقاش غتعيق باللعيبة؟
وتفهم سر المسألة؟
تكعد نوض.. نوووووض
حالتك حالة حالتك حالة حالتك حالة
