توقيع: المجدوب الأصغر
كولسني….. كولسني
ديرني معاك فضمصة
كولسني….. كولسني
نجمع ليك الأصوات
ملي تولي… زعيــم
لا تنساني..في لمصة
****
أنا أحسن حياح
أنا أكبر طواح
أنا أجمل نطاح
عساس عل الدلاح
بغيت منو قرصة
****
في ابحيرة الجمعية
طلقوا ليا لسراح
يكفيكم تنواح
نوضوا نجنيو الغرسة
****
نقابة وحزب ومجلس
شي داخل في شي
ابكي ولا فرنس
هكا بغا مول الشي
****
حدر راسك واحني
خلي لما منين يدوز
يسقي كرعاع ولا لوز
انت لي غادي تجني
****
“اسمع ايا عقلي
اسمع ايا قلبي
مالكم غضبانين؟
ماباغيينش ذاك الشي
داكشي ديال مول الشي؟”
****
جاوبني عقلي:
لا تعاند لا تجاهد
والبقولة لا تقلي
وقالي قلبي:
لا تنافق لا تبالض
المعقول هو لخالد
عنايتي في صدري
لا يغروك البحلاسة
لا يهموك المصاصة
منتاش قرد
منتاش نجاسة
باش تبايع “الزعيم”
****
شكرا.. أيا عقلي
ميرسي..أيا قلبي
راكم فايقين وعساسة
نقيين..خفاف ظراف
ما عفاسة..ما رفاسة
وحق الله العظيم”
ــــــــــ ـــــــــــــــ
ملحوظة: القصيدة موجهة إلى كل هيأة بها أوغاد و سماسرة وسفلة، مقبلة على مؤتمر. وعليه، فكل من وجد تقاطعا بين سلوكه الخسيس وإيحاءات وصور النص فهو المقصود تحديدا. إذا، كل تشابه بين إيحاءات القصيدة وما قد يوازيه في الواقع، فهو مع سبق الإصرار والترصد. انتهى، واجريو طوالكم.
www.achawari.com
